”என்னால் வெல்ல முடியவில்லை: மன்னித்துவிடுங்கள்” - சி ஏ பவானி தேவி

ஜப்பான் தலைநகர் டோக்கியோவில் ஒலிம்பிக் போட்டிகள் நடைபெற்று வருகின்றன. அதில், வாள்வீச்சு போட்டியில், இந்தியா சார்பில் தமிழகத்தைச் சேர்ந்த சி.ஏ.பவானி தேவி போட்டியிட்டார். இவர், ஒலிம்பிக்கில் வாள்வீச்சு போட்டியில் இந்தியா சார்பில் போட்டியிட்ட முதல் வீராங்கனை என்பது குறிப்பிடத்தக்கது.

இவர் தனது முதல் சுற்றுப் போட்டியில், முதல் சுற்றில் துனிசியாவின் நாதியா பென் அஸிஸி உடன் மோதினார். அபாரமாக விளையாடிய பவானி, 15 -3 என்ற புள்ளிக்கணக்கில் வெற்றிப்பெற்று, டேபிள் ஆப் 32 சுற்றுக்கு தகுதிப்பெற்று சாதனைப் படைத்தார்.

இரண்டாவது சுற்றுப் போட்டியில், பவானி தேவி உலகின் 3ம் நிலை வீராங்கனையான, பிரான்சின் மேனோன் ப்ரூனட்டை சந்திக்க வேண்டிய சூழல்  உருவானது. அந்த போட்டியில் பவானி 7-15 என்ற புள்ளிக் கணக்கில் தோல்வியடைந்தார். தோல்வியடைந்தாலும், 2வது சுற்றுவரை முன்னேறிய பவானி தேவியை பலரும் பாராட்டி வருகின்றனர்.

இந்நிலையில், தோல்வி குறித்து பவானி, “இது மிகப்பெரியரிய நாள் இது உற்சாகமாகவும் உணர்ச்சிப் பூர்வமாகவும் இருந்தது. முதல் போடியில் 15-3 என்ற புள்ளிக் கணக்கில் வென்றேன். 2வது போட்டியில் உலகின் 3ம் நிலை வீராங்கனையுடன் தோற்றேன். நான் சிறப்பாக செயல்பட்டும் என்னால் வெல்ல முடியவில்லை. என்னை மன்னித்துவிடுங்கள்.ஒவ்வொரு முடிவிலும் ஒரு தொடக்கம் உள்ளது.எனது பயிற்சியை தொடர்வேன். 

பிரான்சில் நடைபெறவுள்ள அடுத்த ஒலிம்பிக் போட்டியில், கண்டிப்பாக பதக்கம் வெல்வேன். என்னை உற்சாகப்படுத்திய கோடிக்கணக்கான் இந்தியர்களுக்கு நன்றி. குறிப்பிட்டு சொல்ல வேண்டுமானால், என்னுடைய பயிற்சியாளர் நிக்கோலஸ் சனோட்டி, மனநல ஆலோசகர் ஏஞ்சலா கேர்னமல்லோ, எனக்கு தூணாக இருந்த எனது தாய், எனக்காக பிரார்த்தனை செய்த அனைத்து சகோதர சகோதரிகள், தமிழ்நாட்டு ஊடகங்கள் ஆகியவற்றிற்கு எனது நன்றி” எனத் தெரிவித்துள்ளார்.