உத்தரப்பிரதேசம் அருகே நின்று கொண்டிருந்த பேருந்து மீது லாரி மோதி விபத்து: 18 பேர் பலி!

பஞ்சாப் மாநிலம் அம்பாலா நகரிலிருந்து பிஹார் மாநிலத்துக்கு ஒரு பேருந்தில் 130 தொழிலாளர்கள் புறப்பட்டனர். உத்தரப் பிரதேசம் பாரபங்கி மாவட்டத்தில் உள்ள தேசிய நெடுஞ்சாலையில் வந்தபோது பேருந்து திடீரென பழுதானது. பேருந்தின் ஓட்டுநர்கள், பழுது நீக்க நீண்டநேரம் ஆகும் என்பதால், பேருந்தைச் சாலை ஓரத்தில் நிறுத்திவிட்டு, பேருந்தை சரி செய்வதற்காக மெக்கானிக்கைப் பார்க்கச் சென்றுவிட்டனர். இதனால், பேருந்திலிருந்த தொழிலாளர்களில் பலர் அருகே இருந்த மரத்தடி மற்றும் கட்டடம் ஆகியவற்றில் ஓய்வெடுத்தனர், சிலர் சாப்பிடச் சென்றனர். பலர் சாலையின் ஓரத்தில் நிறுத்தப்பட்டிருந்த பேருந்தின் முன் படுத்துத் தூங்கினர்.

அப்போது சாலையில் வந்து கொண்டிருந்த லாரி ஒன்று, நின்று கொண்டிருந்த பேருந்தின் பின்பகுதியில் பலத்த சத்தத்துடன் மோதியது. லாரி இடித்த வேகத்தில், பேருந்து நகர்ந்து சென்று சாலையில் படுத்திருந்த பயணிகள் மீது ஏறியது. அயர்ந்து தூங்கிக்கொண்டிருந்த பயணிகள்மீது பேருந்து ஏறியதில் பலர் உயிரிழந்தனர், ஏராளமானோர் படுகாயமடைந்து உயிருக்குப் போராடினர்.

இந்த விபத்தைப் பார்த்த மற்ற பயணிகள் உடனடியாக போலீஸாருக்குத் தகவல் அளித்தனர். விரைந்து வந்த போலீஸார், காயமடைந்த பயணிகளை மீட்டு அருகிலிருந்த மருத்துவமனைக்கு அனுப்பி வைத்தனர். இந்த விபத்தில் சாலையில் படுத்துத் தூங்கிய பயணிகளில் 18 பேர் உயிரிழந்தனர், 25 பேர் காயமடைந்தனர்.

18 தொழிலாளர்கள் உயிரிழந்த செய்தி கேள்விப்பட்ட பிரதமர் மோடி இரங்கல் தெரிவித்தார்.மேலும், உயிரிழந்தவர்களின் குடும்பத்துக்குத் தலா ரூ.2 லட்சம், காயமடைந்தவர்களுக்கு ரூ.50 ஆயிரம் இழப்பீடு வழங்க உத்தரவிட்டுள்ளார்.